Act 25 | TVK | STEP | Festas temei e taon tahal Sesaria tengan vahur kokot ni polien te vat te kavmen e provins tahal Sudea. Di, melengien tol mitavi, nggo Sesaria e be Serusalem.

Acts 25

Festas Milepis Pol

1 Festas temei e taon tahal Sesaria tengan vahur kokot ni polien te vat te kavmen e provins tahal Sudea. Di, melengien tol mitavi, nggo Sesaria e be Serusalem. 2 E rute ak, vat xil na pris xil del vat xil na Siu xil lamei lapusi. Laseputut ni Pol mini, e lasisi 3 tengan vapol ni lalonge vahos e vamae ni Pol vamei e nim te xeih e hal Serusalem. Xil lasisi mak vengan xa lateling xati ngamu xa lihasi e suse. 4 E Festas biteni mi xil bitene, “Pol da nga nim te xeih e Sesaria. E navehi ti, inou nitilomun nihe rute ak. 5 Xosxa itep, ma vat namim xil mei lihe xamem muvituei muhe Sesaria. Xosxa moletin ak pol ni neta tova xa misa, ma xil likila lihit rati inggaxor.”

6 Festas bas melengien xos tol e he sav (8) mu hexalu (10) del xat xil. Di, dilomun be Sesaria. E visuvong nen, xi dotan e von koten nan, e misemae ni xa lavur Pol vamei nim. 7 Melele xa Pol bemei, Siu xil xa latexo Serusalem latemei, mei lakapis xole e di labit rat sexien tesa hao xa tellep xa labit Pol tepol ni. E lasakras lapisen ni vamal xa naha xa labiteni be reitin. 8 E Pol misep motin xi bit, “Inou natapol ni ti neta vasa vaha ni Rae na Siu xil, mu vaha ni Nim Eo nae, mu vaha ni suv toto tahal Rom.”

9 E Festas ien bei xa Siu xil lamaal ve polien nan, ma misis Pol bit, “?Xouk omae ni xa ove Serusalem tengan ha nilepisuk en?”

10 Ma Pol bit rilomun ni mini bitene, “E-e, natamae ni ti. Taxeak, nasoh ngamu nade von koten na kavmen tahal Rom. Ma e rute ak vari iaxa momal tengan ulepis nou en. Xouk okila ngamu xa inou natapol ni ti neta vasa mi Siu xil. 11 Xosxa nanggur xoteh rae tei mu napol ni neta tei xa misa tengan ha nimat ven, ma ninasak pisi ti ninalesae relingi. E xosxa sepinien nae usil nou be luvosen tang, ma moletin tovuol mikila vamae ni nou name he xil. Imak, ma nasisuk Festas tengan umae ni nou nihe Rom tengan suv toto vari iaxa ilepis rin navan e ngongoren ak e von koten nan.”

12 Ma Festas misepin del moletin xil te kaonsel nan e lasep kil rae xil mini. Di, xi bit rilomun ni mi Pol bit, “Xouk osis nou tengan ha upus suv toto tahal Rom, ma nisa nuk ha upusi.”

Festas Misep Usil Pol mi Suv Toto Akripa

13 Rut melengien xil mei mitavi, Suv Toto Akripa del hineli, Bernis, lumei e hal Sesaria tengan lalsa sepinien te hurpilien nalu mi Festas ve polien hu nan. 14 Melele xa ludi visali melengien vahis, Festas misep usil Pol mi suv toto. Biteni bit, “Melele xa Filiks tehe vat te kavmen, teling moletin tei e nim te xeih, e da tamu xiak. 15 E melele xa natehe Serusalem, vat xil na pris xil del elda xil na Siu xil latehit rat tesaen xil xa tepol ni, e latsis nou tengan nimae ni ha vamat. 16 E natehiteni mi xil xa ngan ak tave sexien na mol-Rom xil ti tengan mamae ni moletin tei vaha valong pangas xi vatiamu. E-e, itiamu, mulepisi e von koten tengan moletin ak ilong sepinien tesa xil xa liso ni iha ni, e xi isep motin xi pe mete. 17 Ma melele xa latemei inggak, natnararu ti. E-e. Ut milan nen tang, natetotan e von koten e natesemae ni tengan litel moletin ak imei nim. 18 E melele xa ngan xil xa iexil minggat moletin ak mei latesoh tengan latesepin, xil latnaso ti sepinien xa vasa pupu vaha xati vaxoni ngan xa inou di natenemi. 19 Xil latengor mini usil neketen nae e usil moletin tei xa hisen Iesu. Xil labit mat vuol, e Pol mike reitin xa xi meul tang da. 20 E melele nen ak, inou natnakil ti vari tengan nikamet reitinen te sepinien nae itep. Ma nasis Pol tengan vamae ni vahe Serusalem tengan lilepis ngongoren nae en. 21 E Pol ien ti tavei, e tesis nou tengan itat e heok inggak ituxoh melele xa nikila nisa ni ihe Rom tengan ha Suv Toto sung ilepis kuh rin nan e ngongoren ak.”

22 Ma Akripa biteni mi Festas bitene, “Inou mun, ieok bei niteong ni ti moletin ak.”

Ma Festas bit, “Bos tang, uteong ni ti sung visuvong.”

23 E visuvong nen, lapisen sexien te sien xa momal ve eilep tei mi Suv Toto Akripa xal hineli Bernis. Ma vat xil te taon ak del vat xil na vanut moletin xil te vaeen ladel xalu lamei del merereen, e ladotan e von vitueien tei xa mahulong. Di, Festas misemae tengan litel Pol imei nim. 24 Di, Festas biteni mi xil bitene, “Suv Toto Akripa e xamim vus xa mudi visal xamem taxeak. Moletin ak iaxa Siu xil vus, e hal Serusalem e inggak, di lasep sisili minou. Xil di ladak kes nou nggeih tova tang tengan mavur xoteh meulien nan. 25 E inou natnakamet ti neta tova xa misa xa xi tepol ni tengan ha vamat ven. Ma melele xa xi tesis nou tengan nisa ni ihe Rom tengan Suv Toto ilepisi sung, inou natemae ni. 26 E nenemien tovuol tamu xa nitis usili tengan nisa ni vatela vaha mi ngan xil tahal Rom. Mak iaxa, nangguri mei misoh pe metom, Suv Toto Akripa, e pe metemim vus tengan melele xa rilepis rin nan e ngongoren ak ivus, nikila sung nitis neta tova. 27 Tamal pupu ti tengan rasa vatxeih tei vaha mi xil xosxa rinavit kil ti veneh ma xa rasa ni ven.”